10 Dec Cerámica Campo obtén a certificación de xestión enerxética ISO 50001 na súa planta de Mesía

A planta de Cerámica Campo, empresa membro da Cámara Oficial Mineira de Galicia (COMG), en Mesía obtivo a certificación de xestión enerxética ISO 50001. Este logro débese á implementación dun sistema que permite optimizar o consumo de enerxía, mellorar a eficiencia das instalacións, reducir custos operativos e fomentar a sustentabilidade ambiental.

O sistema implantado inclúe, ademais doutros medidores específicos de consumo de combustibles, analizadores de redes, que permiten unha medición exhaustiva dos consumos de enerxía nas distintas zonas da fábrica.

A recompilación de datos detallados permite elaborar plans de optimización personalizados, incrementando a competitividade da planta e axudando a alcanzar ambiciosos obxectivos ambientais. Este enfoque proactivo mellora as prácticas da compañía, asegurando operacións máis sostibles e responsables.

O estándar internacional ISO 50001 céntrase na xestión eficiente da enerxía. Adoptar este estándar permite identificar áreas clave para a redución do uso de enerxía e fomenta unha mellora continua nas prácticas operativas. Este compromiso coa eficiencia enerxética reduce custos operativos e contribúe significativamente a unha contorna máis sostible ao diminuír as emisións de gases de efecto invernadoiro.

Coa obtención desta certificación, Cerámica Campo demostra ante os seus grupos de interese que dispón das ferramentas necesarias para xestionar o seu consumo enerxético de maneira máis efectiva e reafirma o seu compromiso coa descarbonización das súas plantas produtivas.