24 Out Tejas Verea estrea unha nova liña de produción con 20 empregos directos

Tejas Verea inaugurou recentemente unha liña de produción destinada á fabricación da nova gama Eternal. Esta ampliación supuxo a contratación de 20 profesionais do concello de Mesía (A Coruña) e un investimento de 3 millóns de euros.

A modernización da fábrica inclúe a instalación dunha planta fotovoltaica, con 1.800 paneis solares, que garante o 100% da subministración de enerxía eléctrica que se consome na recentemente estreada liña.

As tellas Eternal terán unha calidade similar ao gres cerámico, con alta durabilidade e escasa porosidade, que lle permiten ofrecer ata 100 anos de garantía.

“Non hai outra fábrica igual que esta en toda España e este salto tecnolóxico permítenos superar os límites da calidade que conseguiramos ata o momento” subliñou Luís Verea, CEO de Tejas Verea, durante a visita institucional á fábrica do presidente da Xunta de Galicia, Alfonso Rueda; a conselleira de Economía, Industria e Innovación, María Jesús Lorenzana; e o alcalde de Mesía, Mariano Iglesias. Un acto ao que tamén asistiron o presidente da Cámara Oficial Mineira de Galicia, Juan José López Muñoz; e a directora da entidade, Arantxa Prado Santiago.

Alfonso Rueda destacou durante o acto o carácter innovador desta empresa instalada en Mesía (A Coruña) hai máis de 50 anos e que ten presenza en máis de 30 países. “Que unha gran parte do mercado fágase con tella galega e saia desta fábrica quere dicir que as cousas se fan moi ben, ademais nun mundo tan competitivo como o de agora”, apuntou. Ademais, o mandatario galego subliñou a “importancia da minería sostible” para a competitividade do tecido industrial.