Cámara Impulsa

Cámara Impulsa xorde como unha figura destinada a potenciar o desenvolvemento e a competitividade do sector mineiro galego mediante o impulso de iniciativas que faciliten a captación de fondos para as empresas, a incorporación de novas tecnoloxías e o fomento do talento e das boas prácticas. Todo isto contribúe a unha modernización integral do sector e á súa plena integración nas cadeas de valor estratéxicas de Galicia e de Europa.

Esta iniciativa nace da evolución da Oficina de Impulso de Proxectos Europeos cara a un modelo máis próximo, colaborativo e orientado ás necesidades reais das empresas, pasando a denominarse Cámara Impulsa. Este cambio de identidade reflicte un novo enfoque centrado especialmente nas pequenas e medianas empresas, co obxectivo de acompañalas na súa actividade diaria e facilitar o seu acceso á innovación, á dixitalización e ás oportunidades de financiamento europeo.

Así mesmo, Cámara Impulsa incorpora un enfoque estratéxico dirixido a reforzar a visibilidade do sector mineiro galego, promovendo unha imaxe moderna, responsable e innovadora a través da divulgación de avances tecnolóxicos e de boas prácticas. Deste xeito, actúa como un axente dinamizador que favorece a transferencia tecnolóxica, a sensibilización social e a adopción de novas solucións innovadoras, aliñándose cos obxectivos da Axenda de Impulso da Minaría Sustentable de Galicia 2030.