23 Mar Pasek Minerales recibe a certificación UNE de Xestión de Minaría Sostible

O pasado xoves, Pasek Minerales celebrou xunto á Cámara Oficial Mineira de Galicia o acto de entrega da súa recente certificación UNE 22480:2019. Sistema de xestión mineira-metalúrxica sostible. Unha xornada na que participaron Pablo Cuervo-Arango, CEO de Pasek Minerales; María Coutinho Villanueva, subdirectora Xeral de Recursos Minerais; Pablo Fernández Vila, director xeral de Planificación Enerxética e Recursos Naturais; e Juan José López Muñoz; presidente da COMG.

Pasek Minerais extrae dunita na provincia da Coruña, un mineral que despois se exporta a través dos portos de Cariño e Ferrol.

A empresa mineira recibe este selo outorgado por AENOR como recoñecemento do seu compromiso coa xestión sostible da súa actividade. A norma UNE 22480:2019 permite facer un seguimento, por medio de indicadores, de parámetros de tipo económico, social e ambiental na actividade industrial.

A certificación obtida recoñece desta forma a implicación da compañía coa súa contorna e a súa conexión coa comarca, a través da xeración de riqueza na zona, creación de emprego local e o respecto polo medio ambiente.

A Cámara Oficial Mineira de Galicia impulsa e promociona desde hai anos a implantación desta norma nas empresas extractivas galegas para continuar avanzando cara á sustentabilidade e a excelencia empresarial. Pasek Minerais é a empresa número 15 en obter este recoñecemento, polo que a comunidade galega sitúase como líder nacional en empresas certificadas.

Pablo Fernández Vila explicou durante o acto a aposta que se está levando a cabo desde o goberno galego para desenvolver este tipo de procesos, que recibiron un impulso grazas ao convenio nesta materia asinado en 2021 coa Cámara Oficial Mineira de Galicia.

Fernández Vila tamén lembrou as liñas de axudas -abertas ata o 14 de abril- para o fomento da sustentabilidade no desenvolvemento da actividade industrial no sector dos recursos minerais.