27 Feb A Cámara Oficial Minera de Galicia firma un acordo de colaboración coa Comunidade Foral de Navarra e Geoalcali
A Cámara Oficial Mineira de Galicia (COMG) asinou esta mañá un convenio de colaboración coa Comunidade Foral de Navarra e a empresa Geoalcali para promover o coñecemento do sector mineiro.
O acordo permitirá ás partes intercambiar información e materiais informativos, así como a realización de actividades e proxectos “para a mellora do coñecemento por parte da sociedade da función e características do sector mineiro”.
En representación da Comunidade Foral de Navarra, Yolanda Blanco Rodríguez, Directora Xeral de Industria, Energía y Proyectos Estratégicos S3 participou, destacando a importancia destes materiais que “representan o aumento das vocacións nas carreiras STEAM nos escolares”. Blanco tamén destacou a necesidade de “aumentar o coñecemento dos estudantes sobre a importancia do sector mineiro para a sociedade”.
A empresa mineira Geoalcali estivo representada por Ricardo Pérez Medina, director de relacións institucionais, quen asegurou que “a divulgación científica é crucial para fomentar unha xeración de profesionais responsables e comprometidos coa sustentabilidade”.
Juan de Dios Martín Aparicio, presidente da COMG, explicou a importancia de que “a Comunidade Foral de Navarra apoiase esta iniciativa que no seu momento xa tivo o apoio da Xunta de Galicia”.
A través deste acordo, a COMG proporciona a súa experiencia con unidades educativas e vídeos dirixidos a escolares, así como manuais de ensino para docentes elaborados en 2018 pola plataforma Minaría Sostible de Galicia. Estes materiais serán adaptados por Geoalcali e pola Comunidade Foral de Navarra para explicar a importancia do sector mineiro.
A Comunidade Foral de Navarra prevé empregala nas escolas para visibilizar que os recursos minerais son motores da economía e do progreso, materiais esenciais para a vida, para a industria e para a agricultura.
Pola súa banda, a COMG incorpora a experiencia de Geoalcali na divulgación e difusión de actividades mineiras, especialmente as relacionadas coa exposición itinerante “Minerais esenciais para un futuro sostible”.