20 Dec As materias primas críticas, protagonistas no Parlamento Europeo da man do Colexio Oficial de Xeólogos

Recentemente, o Parlamento Europeo foi escenario dun diálogo estratéxico de alto nivel sobre a relevancia da xeoloxía en temas críticos como o cambio climático, os materiais estratéxicos e a política enerxética.

Este evento, organizado pola Federación Europea de Xeólogos, reuniu a destacados eurodeputados, expertos da Comisión Europea e representantes de asociacións nacionais de xeociencias para definir estratexias que impulsen a competitividade e a sustentabilidade en Europa.

A segunda mesa redonda do encontro, na que se abordaron os desafíos e oportunidades relacionados coas materias primas críticas e as políticas enerxéticas, estivo moderada por Pablo Núñez, delegado en Galicia do Ilustre Colexio Oficial de Xeólogos, membro da Cámara Oficial Mineira de Galicia (COMG).

Do mesmo xeito, Pablo Núñez tamén participou recentemente como relator na Raw Materials Week 2024, organizada pola Comisión Europea en Bruselas, representando a Atalaya Mining e Cobre San Rafael, empresa membro da COMG. Durante a sesión ‘Enfoques estratéxicos de exploración de materias primas’, o xeólogo resaltou a importancia de integrar sustentabilidade, innovación tecnolóxica e resiliencia nas cadeas de subministración, claves para a independencia estratéxica de Europa.