A Cámara Oficial Mineira de Galicia ( COMG) colabora, un ano máis, nas actividades que organiza a ETSE de Minas da Universidade de Vigo con motivo da Semana da Ciencia. Nesta edición, que se prolongará desde o luns 17 ao venres 21 de novembro, a temática elixida é Enerxía, materiais e medio ambiente: en todas partes.

Está previsto que máis de 1.000 alumnos de 32 centros preuniversitarios coñezan as instalacións da ETSE de Minas, nas que se dispoñerán espazos de aprendizaxe e divulgación, a modo de museo interactivo, atendidos polo alumnado da propia Escola. Trátase de transmitirlles aos visitantes “a importante e imprescindible labor de aproveitamento sustentable dos recursos mineiros e enerxéticos a favor da sociedade”, segundo sinalan desde Minas.

A colaboración da Cámara Oficial Mineira de Galicia consiste na doazón de publicacións, que se lles entregarán aos centros que participen nesta iniciativa didáctica. A COMG súmase así ao achegamento da minería ao sector máis novo da poboación, co obxectivo de que coñezan a relevancia dos recursos minerais ao longo da historia.