A Cámara Oficial Mineira de Galicia (COMG) celebrou este xoves a súa cita anual clave para compartir cos seus socios o balance de actividade do último exercicio e as principais liñas de traballo do organismo. A sesión foi inaugurada polo director xeral de Planificación Enerxética e Minas, Pablo Fernández.

Unha asemblea para facer balance e marcar prioridades

Este ano a Asemblea Ordinaria da COMG, ademais de facer balance de actividade, destacou a importancia da minería no contexto xeopolítico actual, consolidándose como peza clave para o desenvolvemento industrial de Galicia e o seu impulso tecnolóxico. Así mesmo, fíxose un repaso da xestión realizada, revisouse o traballo desenvolvido e aliñáronse prioridades co conxunto de socios, empresas e profesionais que integran a entidade.

Nesta edición, ademais, a reunión adquire un significado especial ao recompilar todas as accións realizadas no marco da celebración do seu Centenario, que se culminou coa instalación dunha placa no lugar onde comezou a traxectoria institucional da COMG: na súa primeira sede en Riego de Agua.

Un Centenario cheo de iniciativas en toda Galicia

O peche de actividades polo Centenario consolídase cun programa que incluíu accións de divulgación, participación e posta en valor do sector, entre elas:

  • A exposición itinerante ‘Tesouros da Terra’, que percorreu distintos puntos do territorio galego.
  • Os ‘Encontros polo Centenario’, concibidos como espazos de diálogo sobre o pasado, presente e futuro de Galicia.
  • A gala do Centenario, cun recoñecemento especial ligado á historia institucional da entidade.
  • A edición dun libro sobre a traxectoria da Cámara, da man do xornalista José Salgado, abordando a súa capacidade de adaptación e o seu papel de conexión entre subsectores mineiros galegos.
  • A recuperación e reimpresión do primeiro boletín de 1925, onde se describían a constitución da Cámara e os seus propósitos.
  • A renovación da imaxe corporativa, cun novo logo e o lema “Cen anos de minería unidos polo futuro de Galicia”.

Con esta perspectiva, a COMG reafirma o seu compromiso de seguir actuando como motor de desenvolvemento, diálogo e excelencia, impulsando unha minería moderna, responsable e aliñada cos retos estratéxicos do presente.

A clausura da Asemblea correu a cargo do subdirector xeral de Recursos Minerais da Xunta de Galicia, Diego Casal.