01 Abr A COMG presenta casos de éxito da minaría sostible galega nunha xornada enmarcada no proxecto europeo PICOBELLO

A Cámara Oficial Mineira de Galicia (COMG) participou, da man da Oficina de Impulso de Proxectos Europeos (OIPE), nunha segunda xornada de stakeholders para o intercambio de boas prácticas no ámbito da sostibilidade, celebrada o venres 28 de marzo na Fundación Juana de Vega, en Oleiros (A Coruña), e organizada pola Axencia Galega de Innovación. Este evento enmárcase no proxecto Interreg Europe PICOBELLO, que busca integrar os valores da Nova Bauhaus Europea (NEB) nos instrumentos políticos existentes.

Na intervención realizada pola COMG, presentáronse diferentes casos de éxito de minaría sostible en Galicia que implementaron prácticas innovadoras en sostibilidade, restauración ambiental e economía circular, e a súa relación coa consecución dos obxectivos da NEB. Tamén se destacou a importancia da minaría na transición cara a unha economía máis sostible, proporcionando materiais esenciais para as enerxías renovables e a tecnoloxía avanzada. Ademais, subliñouse o papel da OIPE na consecución dos obxectivos da Axenda de Minaría Sostible de Galicia 2030 e o Premio da Fundación Minería e Vida á plataforma Minaría Sostible de Galicia no MMH 2024.