A Cámara Oficial Mineira de Galicia (COMG), a través da súa plataforma Minaría Sostible, reforzou a divulgación do patrimonio mineiro e xeolóxico galego coa instalación de oito novos tótems informativos (monólitos de ferro) en diferentes enclaves do território galego. A iniciativa, desenvolvida ao longo de 2025, busca poñer en valor lugares de interese histórico vinculados á minería e mellorar a experiencia de veciñanza e visitantes.

Os novos puntos incorporados son As Médulas das Borreas (Viana do Bolo); as minas de estaño e volframio de Beariz; as Lagoas de Mina Mercedes e Porto Piñeiro (Valga); dous puntos nas Areeiras da Limia (Sandiás e Xinzo de Limia); ademais da Olería de Buño (Malpica de Bergantiños) e do Manancial de Cabreiroá (Verín).

 

Areeiras da Limia (Sandiás)

As localizacións seleccionáronse priorizando a relevancia histórica do sector mineiro e a afluencia turística, en coordinación con concellos e entidades colaboradoras, e procurando tamén representatividade xeográfica e de distintas épocas e tipos de explotación. Parte do traballo intégrase en rutas xa impulsadas pola Cámara no marco do programa MINATUR.

Coa incorporación destes tótems, a Cámara suma xa 23 puntos sinalizados en Galicia desde 2019, dos cales 15 foron instalados en 2024. Esta iniciaitiva continuará durante este ano co obxectivo de ofrecer máis recursos para coñecer e comprender a historia mineira dos municipios.

Mina  Mercedes (Valga)

Os monólitos, de ferro e 80 centímetros de altura, inclúen un panel con título e descrición do lugar e un código QR que permite acceder desde o móbil á web da plataforma Patrimonio Mineiro de Galicia, onde se amplía a información e, cando procede, pódense consultar rutas asociadas.

A maiores, a COMG elaborou para cada un dos 23 puntos vídeos divulgativos de entre 1 e 2 minutos, cun enfoque didáctico e visual, accesibles a través da web e tamén no canle de YouTube da entidade.

Novas accións divulgativas e rutas guiadas

No marco das súas accións de difusión, a Cámara ampliou o contido do portal Minaría Sostible con dous novos apartados dedicados á historia da minería do ferro e do estaño e volframio en Galicia, con textos divulgativos, imaxes, fotografías antigas e táboas didácticas, ademais dun acceso a rutas e puntos de interese mediante lista e mapa interactivo.

Estas accións compleméntanse coas rutas guiadas iniciadas en 2023, como as visitas á Mina de Silvarosa (Viveiro), Borreas (Viana do Bolo), Pico Sacro (Boqueixón-Vedra), a visita en barco aos cargadeiros de mineral de Rande (ría de Vigo) e a última realizada en 2025 en Ponteareas, desde o túnel de Confurco ata o balneario de Mondariz.

Para o conxunto destas iniciativas, a COMG conta co apoio da Consellería de Economía e Industria da Xunta de Galicia.