Un estudo recente realizado en colaboración entre a Xunta de Galicia e a Universidade de Santiago de Compostela (USC) sitúa a Galicia no mapa europeo como unha das rexións con maior concentración de minerais críticos, esenciais para o desenvolvemento industrial, tecnolóxico e enerxético da Unión Europea. Segundo este informe, o valor económico potencial dos recursos mineiros galegos pode acadar os 45.000 millóns de euros, con 18 dos 34 elementos considerados críticos pola UE localizados no territorio autonómico.

O informe, que toma como base preto de 43.000 mostras xeiquímicas do Instituto Geológico y Minero de España (IGME) e a caracterización de 127 zonas prospectivas, revela que Galicia alberga o 53% dos materiais críticos identificados pola Unión Europea. Entre estes recursos atópanse metais e materias primas esenciais para sectores como a tecnoloxía dixital, a automoción, o hidróxeno verde ou a defensa.

Cinco corredores estratéxicos de materias primas

O estudo identifica cinco corredores principais nos que se concentran os recursos estratéxicos:

  • Santiago – Touro – Lalín: destaca pola súa riqueza en cobre, cobalto, zinc, galio, germanio e indio. É o maior depósito de cobre de Galicia e unha zona clave para as enerxías renovables e a electrificación.

  • Cabo Ortegal – Moeche: rico en cromo e elementos do grupo do platino, de grande valor para a industria do hidróxeno, a electrónica e a automoción.

  • Penouta – Forcarei: aporta tantalio, niobio, litio e estaño, fundamentais para a industria tecnolóxica e o almacenamento enerxético. Ademais, Penouta é o único lugar con produción activa de tantalio en Europa.

  • San Fins – Santa Comba: con volframio, estaño e bismuto, minerais esenciais para aliaxes de alta dureza, ferramentas industriais e electrónica de potencia.

  • Vigo – Tui – Porriño: pola súa extensión, é o segundo corredor máis amplo. É especialmente relevante en terras raras, materias clave para a transición enerxética.

Potencial para a industria e a transición enerxética

O informe proporciona unha avaliación integral do potencial de elementos críticos de Galicia, que servirá de base para a toma de decisións estratéxicas nos próximos concursos de dereitos mineiros e na ordenación mineira en xeral.

Na actualidade, Galicia xa conta con proxectos mineiros para a extracción de materias primas críticas e estratéxicas que se atopan en diferentes fases de tramitación. Entre as explotacións activas destaca Magnesitas de Rubián, no Incio (Lugo), onde se extrae magnesio; tamén Áridos do Mendo, que destaca por extraer, ademais de áridos, ouro e terras raras. E entre os proxectos que se pretenden reactivar figuran a mina de cobre de Touro (A Coruña) e a de A Penouta en Viana do Bolo (Ourense), con minerais como cobalto e tántalo, así como o litio de Doade, entre Pontevedra e Ourense.

A Xunta, a través da Consellería de Economía e Industria, está a impulsar a ordenación mineira e a potenciación destes recursos, coa convocatoria de concursos de dereitos mineiros caducados para as catro provincias. Prevese que en 2026 se convoquen novos concursos, priorizando substancias primas críticas como o litio ou o wolframio.

Cara a un futuro mineiro responsable

O informe elaborado en colaboración coa USC proporciona unha avaliación integral do potencial de elementos críticos en Galicia, ofrecendo unha base sólida para a toma de decisións estratéxicas na ordenación e o desenvolvemento responsable da minería.

O compromiso da Xunta e da Cámara Oficial Mineira de Galicia é seguir avanzando cara a un modelo moderno, sostible e transparente, que converta os recursos xeolóxicos de Galicia en motor de innovación, emprego e benestar social para as vindeiras xeracións.