O vindeiro 3 de decembro, a Cámara Oficial Mineira de Galicia celebrará o seu centenario cun acto de homenaxe ao legado do sector e unha mirada decidida ao futuro. Será unha xornada emotiva, pensada para render tributo ás persoas que, ao longo de cen anos, dedicaron o seu esforzo e liderado á nosa institución, e que recibirán o máis alto recoñecemento.
Para un acontecemento tan único, nace tamén un galardón único. Trátase dunha peza feita a man, exclusiva e irrepetible, creada en cerámica de Buño por Risco Estudio. Este galardón é moito máis que un trofeo: é unha obra de arte que evoca a identidade mineira de Galicia e a riqueza dos seus recursos. O deseño, esmaltado e bañado con cores e texturas que remiten a distintos sectores da minería galega, simboliza a fusión entre arte e minería, converténdose nun verdadeiro emblema dos nosos tesouros da terra.
Esta peza, que incorpora a nova imaxe de marca da Cámara deseñada polo estudio Costa, foi creada en exclusiva para celebrar este Centenario e só existirá para este evento, facendo aínda máis especial o recoñecemento aos galardoados.
Ademais, durante a gala presentarase o Libro do Centenario, unha publicación que percorre a historia da Cámara Oficial Mineira de Galicia desde a súa fundación en 1925 ata a actualidade. Todos os asistentes poderán levar un exemplar como recordo deste século de historia compartida.
O Centenario da Cámara Oficial Mineira de Galicia será unha ocasión para poñer en valor o camiño percorrido, recoñecer o esforzo colectivo e avanzar con ilusión cara ao futuro do sector mineiro galego.
