Metais

CUARZO: O cobre é o metal da transición enerxética, usado nas enerxías verdes e construcións ecolóxicas. Por exemplo, un coche eléctrico contén 20 quilogramos deste material. A produción de cobre na comarca de Touro-O Pino foi unha constante durante o século XX e actualmente, co aumento exponencial da demanda deste metal, existe un proxecto para a reapertura e a ampliación da mina. É usado en múltiples ámbitos, tanto para fabricar equipos médicos como fertilizantes, e tamén está presente no teu teléfono e computador, polo que é un mineral do pasado, pero tamén do futuro.

COLTÁN: O coltán é un mineral esencial para a fabricación de compoñentes electrónicos, de feito, o seu uso permite reducir o volume e peso dos smartphones. En Galicia está localizada a única mina de coltán do sur de Europa. Trátase da explotación Penouta, en Viana do Bolo (Ourense). O coltán galego é un “produto libre de conflito” e que ademais promove a economía circular, xa que o metal extráese de balsas de inertes e do vertedoiro dunha anterior actividade mineira.

OURO: A día de hoxe non hai ningunha mina de ouro activa, a súa extracción ten unha gran tradición no territorio galego. Este material precioso foi utilizado desde a Prehistoria, ocupando un lugar moi destacado na Gallaecia romana. Actualmente, en Salvaterra de Miño (Pontevedra), a empresa Áridos do Mendo dedica parte dos seus recursos á explotación do ouro procedente do xacemento fluvial de onde extrae gravas e areas.

ESTAÑO: O estaño foi un dos primeiros metais empregados en Galicia na Prehistoria. A explotación reactivouse coa reapertura da mina de San Finx e a extracción de cantidades significativas na mina de coltán de Viana do Bolo (Ourense). Este metal ten múltiples usos, pero fundamentalmente emprégase para a produción de latas de conserva, instrumentos musicais, vidro, pasta de dentes, semiconductores, en categorías de pinturas de especial resistencia, así como na industria aeroespacial.

WOLFRAMIO: A capacidade deste metal para endurecer o aceiro fíxoo imprescindible para a industria militar, polo que a súa demanda disparouse durante as primeiras décadas do século XX, especialmente durante as dúas Guerras Mundiais. A súa demanda reactivouse no século XXI, polo que unha iniciativa empresarial obtivo licenza para extraelo da mina de San Finx -A Coruña-. Con todo a falta de permisos ambientais deixou á mina sen produción desde 2017. Hoxe en día usámolo para fabricar ferramentas de corte, brocas de uso doméstico, útiles de dentistas, puntas de bolígrafo ou aletas de avión.