01 Xul A directora da COMG destacou a importancia da Lei de Recursos Naturais para a minería nun encontro organizado por La Voz de Galicia

O 29 de xuño, a directora da Cámara Oficial Mineira de Galicia, Arantxa Prado, participou nun café de redacción organizado por La Voz de Galicia, ao que tamén asistiron a conselleira de Economía e Industria da Xunta de Galicia, María Jesús Lorenzana, e a vicepresidenta de Ivenergy Services, Mónica Carballeira.

Durante o encontro, as tres participantes conversaron acerca da Lei de Recursos Naturais, que acaba de iniciar a súa tramitación no Parlamento galego. Esta norma obrigará ás empresas que queiran desenvolver proxectos industriais na comunidade a establecer porcentaxes mínimas na súa conta de resultados para destinalas a beneficios sociais.

Como avanzou a conselleira, o obxectivo é identificar uns “indicadores cuantitativos” que permitan valorar o impacto social e económico asociado a cada proxecto industrial para que repercutan de maneira especial nas comunidades locais que sofren este impacto.

Neste contexto, a directora da COMG manifestou que a Lei de Recursos Naturais “ten unha parte interesante para o sector”, posto que, ademais de apoiar aos proxectos mineiros nos seus obxectivos, “fomenta que se peche en Galicia o círculo da cadea de valor”.

A directora da COMG tamén lembrou o gran potencial mineiro da rexión, onde sería posible extraer polo menos sete das 34 materias primas críticas da Unión Europea, entre as que se atopan o cobre, o níquel, o litio, o wolframio ou o coltán. Neste sentido, destacou a importancia de axilizar os concursos de exploración do territorio, “porque só o 2% das exploracións que se fan acaban sendo minas“.

Podes consultar a noticia completa de La Voz de Galicia na seguinte ligazón.