A Cámara Oficial Mineira de Galicia (COMG), a través da Oficina de Impulso de Proxectos Europeos, participou o pasado 30 de setembro na segunda reunión de stakeholders locais do proxecto Interreg PICOBELLO, celebrada en Silleda, Pontevedra. Este encontro, concibido como un espazo para compartir boas prácticas e experiencias en liña cos valores da New European Bauhaus (NEB), reuniu entidades e axentes galegos comprometidos coa rexeneración estética, ambiental e social dos territorios.
Durante a xornada, a COMG presentou o caso da Lagoa da Mina Mercedes, en Valga, como exemplo destacado de restauración e sustentabilidade no sector mineiro galego. Este proxecto ilustra como un antigo entorno extractivo pode converterse nun espazo de convivencia, biodiversidade e valor paisaxístico, aliñado cos principios de sustentabilidade, inclusión e beleza que promove a NEB.
A Lagoa da Mina Mercedes é o resultado dun proceso de restauración ambiental que permitiu transformar o impacto da actividade extractiva nun novo ecosistema de alto valor ecolóxico e social. O espazo recuperado non só contribúe á mellora da biodiversidade local, senón que tamén se converteu nun lugar de encontro para a comunidade, integrando usos educativos, recreativos e de sensibilización ambiental.
Coa súa participación no proxecto PICOBELLO a través da Oficina de Impulso de Proxectos Europeos, a COMG pretende subliñar o compromiso do sector mineiro galego coa innovación e coa aplicación de boas prácticas en sustentabilidade. Iniciativas como a restauración da Mina Mercedes actúan ademais como referencia para outros proxectos de rexeneración en Galicia e en Europa, demostrando que a minería pode ser compatible coa protección do entorno e coa mellora da calidade de vida.
