Áridos

cen anos de minería unidos polo futura de Galicia

Un gran volume de rocas obtidas en Galicia teñen por destino a construción de estradas, formigóns e cementos; estas son coñecidas como áridos. Trátase de rocas divididas en fragmentos que tamén son claves para industrias como a metalúrxica e a química. Son a segunda materia prima máis consumida do mundo, só por detrás da auga.

O árido é un dos piares da construción e diferénciase doutros materiais pola súa estabilidade química e resistencia mecánica.

TIPOS DE ÁRIDOS SEGUNDO A SÚA ORIXEN

  • ÁRIDOS NATURAIS: Os áridos naturais supoñen un 90% dos áridos que se extraen para a súa comercialización. Proceden de depósitos detríticos de areas e gravas, e de materiais máis ou menos disgregados e alterados por meteorización de granitoides e doutras litoloxías como areniscas, cuarcitas ou lousas. Presentan unha forma redondeada, de superficies lisas e sen arestas. A extracción destes áridos realízase directamente por medios mecánicos e apenas necesitan tratamento a posteriori.

  • ÁRIDOS DE MACHUCADURA: Os áridos de machucadura prodúcense nas canteiras tras arrincar os materiais dos macizos rochosos e sometelos despois a un proceso de triturado e moenda. As súas superficies son rugosas e angulosas. Son moitas as litoloxías, de distintos dominios xeolóxicos, que se aproveitan como áridos de machucadura: granitos, calcarias e dolomías, cuarcitas e areniscas, anfibolitas, xistos, gneises, gabros, migmatitas, cuarzo, pórfidos e peridotitas.

  • ÁRIDOS ARTIFICIAIS: Son os resultantes dun proceso industrial ou mineiro, ou que foron sometidos a algunha modificación físico-química doutro tipo. Son materiais de derriba, reutilizables e reciclables.

EN GALICIA EXISTEN ZONAS DE INTERESE PARA A OBTENCIÓN DE ÁRIDOS NATURAIS:

A Conca de Xinzo de Limia, onde existe un depósito de areas e gravas finas moi valoradas para a fabricación de morteiros, revocos e recheos etc.

As terrazas do río Miño, onde se extraen gravas grosas e cantos (que poden ser tratadas por machucadura), así como areas. O seu uso principalmente é para fabricación de formigóns e produtos para a construción de viais.