Un vídeo divulga a relevancia das históricas canteiras de Penaboa, na Coruña

A Unidade de Cultura Científica e da Innovación da Universidade Complutense de Madrid (UCM) divulgou un vídeo sobre a relevancia das históricas canteiras de Penaboa, na Coruña, e da súa leucogranito. No documento audiovisual reivindícase a importancia da posta en valor deste patrimonio, imprescindible para entender a cidade herculina.

E é que segundo explica o seu locutor, este leucogranito da base do monte de San Pedro foi utilizado en numerosas igrexas, fontes, edificios e pavimentos do centro histórico desde polo menos o século XII. Así, as igrexas románicas de Santa María del Campo e de Santiago; as igrexas das Capuchinas (actual museo de Belas Artes) e a de San Jorge ou os conventos de Santa Bárbara e das Clarisas Descalzas foron construídas con este material.

A pedra extraída de Penaboa forma parte tamén das fontes de Neptuno e da Fama, así como de "balcóns, escudos e escaleiras que embelecen a cidade da Coruña". Mesmo o pedestal da Torre de Hércules, declarada Patrimonio da Humanidade polo Unesco, está feito co granito das canteiras históricas situadas nos cantís de Penaboa.

Patrimonio e sustentabilidade

Para os autores do vídeo, "a posta en valor de canteiras históricas e a súa vinculación cos monumentos construídos coas súas pedras fomenta a conservación do patrimonio tanxible e intanxible". "O uso das pedras tradicionais de construción é unha aposta pola sustentabilidade que dota de identidade aos centros urbanos de forma coherente coa súa propia historia e contorna", engaden.

Ademais, demandan "a restauración dos edificios patrimoniais co material orixinal" como garantía de conservación do patrimonio material e inmaterial.

Turismo cultural

Por outra banda, destácase a posición estratéxica desta canteira histórica, que permite "a súa posta en valor e unha visita cómoda para entender os modos de facer dos canteiros artesáns e a xeoloxía da zona", como reclamo para o turismo cultural.

Segundo sinalan, hoxe en día pódense observar "numerosos vestixios de cantaría histórica no enclave, como marcas de canteiros, cuñeiras e perpiaños, o que indica que o lugar foi un centro de explotación no pasado". Refírense tamén o valor desta canteira como "escaparate da xeoloxía endóxena".

O leucogranito presente no monte coruñés de San Pedro foi xa proposto polo Grupo de Investigación de Petroloxía Aplicada á Conservación do Patrimonio do Instituto de Xeociencias da UCM como candidato ao Global Heritage Stone Resource. Este recoñecemento é o equivalente a patrimonio da humanidade no mundo lítico.