A minaría en Galicia non é unha actividade nova, xa que se recoñece a súa existencia desde a prehistoria. A situación actual é, por tanto, froito dunha evolución histórica e unha cultura propia que conseguiron converter á Comunidade galega nunha potencia extractiva.

Co granito e a lousa como principais produtos mineiros, Galicia lidera os mercados nacionais e internacionais, con centos de explotacións e unha facturación aproximada que supera o medio millón de euros anuais. Desta forma, o sector mineiro ten un papel fundamental no tecido industrial galego, pola riqueza que representa e os postos de traballo que proporciona.

As sustancias minerais participan de forma básica en importantes sectores, como a construción, e teñen aplicacións pouco coñecidas, como o uso de boratos en tratamentos do cancro, ou de sílice nos paneis fotovoltaicos e nos telescopios espaciais.

Pero máis aló da súa relevancia económica, non podemos esquecer que a minaría está presente en practicamente toda a actividade humana, xa que, exceptuando a madeira e as fibras naturais, todos os materiais empregados polo ser humano para o seu desenvolvemento son de base mineral. De feito, cada europeo consome unha media anual de entre 5 e 10 toneladas de produtos minerais, e estímase que ao longo da nosa vida cada persoa consumiria máis de 400 toneladas destes produtos, exceptuando os enerxéticos.